Mga Pangutana ug Tubag

Inigkatawo sa bata gikan sa iyang ginikanan nga tawo, gitawag dayon siya ug anak nga tawhanon. Ang bunyag naghimo kanato nga Anak nga Diosnon, diha sa Iyang grasya gibayaw kita ngadto sa hataas nga kahimtang sama sa Dios. Si Jesus miingon, “Gawas ang tawo igaanak pag-usab sa tubig ug sa espiritu santo dili siya makasulod sa gingharian sa Dios.” (Juan 3:5) Dinhi makita nato nga ang bunyag mipasakop kanato ngadto sa gingharian sa Dios, ug nahimo kitang usa ra ka lawas (1 Kor. 12:12) nga mao ang iglesia (Col. 1:18) tungod kay ang bunyag nagaepekto sa atong kalag sa pag-ambit sa kinaiya ni Kristo. “Gibunyagan kamo aron mahiusa ni Kristo, busa nakaambit kamo sa kinaiya ni Kristo.” (Gal. 3:27, Bag-ong Huban Kumon). Maingon nga ang sirkumsisyon gidapat bisan sa mga bata pa aron mahisakop sa katawhan sa Dios ang Israel sa samang paagi ang bunyag igadapat usab sa mga bata karon aron mahimong sakop sa katawhan sa Dios, ang Iglesia.